Тофу суфлаки, затоа што не можеш да поминеш два месеци во Грција, без да јадеш месо и да не го направиш, нели? По мене, најубавото кај медитеранската кујна е што лесно се прилагодува без да го изгуби својот препознатлив карактер. Токму така настана ова тофу суфлаки „тофлаки“. Мојата растителна верзија на традиционалното суфлаки, во кое главната улога ја има тофуто. Во комбинација со црвена, жолта и портокалова пиперка, зелена тиквичка и виолетов кромид, добив превкусен шарен оброк! Маринирано со превкусна маринада, а потоа испечено додека не добие златна боја, ова јадење е доказ дека едноставните состојки можат да создадат богат и незаборавен вкус. Лесно е, свежо, богато со растителни протеини и совршено за секоја летна трпеза.

И освен што ова тофу суфлаки е ароматично и сочно, многу вкусно и веднаш ќе ве транспортира на море, и е супер опција за вашиот следен ручек (малку калории, многу протеини)!

За целиот рецепт скролни надолу а кај мене на инстаграм во reels имаш и кратко видео одподготовката!

Како да го направиш ова Тофу Суфлаки?

Всушност, целата поента е во маринадата. Во оваа верзија, лимоновиот сок внесува свежина, лукот додава длабочина, а ориганото, сусамот и чадената пиперка создаваат препознатлив медитерански шмек. Сенфот во комбинација со соја сос, го доближува тофуто до вкусот на месо. А, зеленчукот, пак, при печење добива природна сладост и лесно карамелизира, па секое раженче нуди совршен баланс помеѓу сочност, крцкавост и арома. Освен што е шарен (баш по мој вкус), ова е и оброк што обезбедува квалитетни растителни протеини, влакна, витамини и минерали, без да биде тежок или премногу калоричен.

Еден pro tip: краевете на стапчињата натопи ги убаво во вода, за да не изгорат при печење!

Инаку, целиот рецепт има 446 калории, 31 грам растителен протеин и 10 грама растителни влакна.

Тофу гиро, затоа што ние што не јадеме месо, нема причина зошто да треба да патиме, нели? Ако сум комплетно искрена, од гиро памтам само како мириса (бидејќи често одам во Грција, ама вкусот вооптшо не памтам каков е). Но, без разлика, ова мое тофу гиро излезе превкусно, прекрцкаво, преароматично и пребогато со растителни протеини. Овој рецепт содржи дури 40гр. протеин.

Јас го направив во готови пити, со микс зелена слата, домати маринирани со балзамико и зачини и цацики од мојата веганска павлака. Вие можете да си додадете и компирчиња во air-fryer со многу малку масло и многу зачини (крцкање насекаде).

И освен што ова тофу гиро е крцкаво и сочно, многу вкусно и веднаш ќе ве транспортира на море, и е супер опција за вашиот следен ручек.

Како да го направите ова Тофу Гиро?

Постапката е навистина брза и лесна! Мене ми требаа: 15 минути за маринирање и печење на тофуто, 5 минути за одмрзнување и затоплување на питата, 30 минути за киснење на индиските и правење на цацикито и неколку секунди да склопување на гирото. А толку ми беше вкусно, што јадењето беше буквално 2 минути 😂

Значи вкупно 50 минути, од кои 30 се за киснење на индиските ореви. Доколку си ги накиснете од претходно, ќе имате готов оброк за 20тина минути. Инаку, целиот рецепт и начинот на подготовка го имате подолу во рецептот, а имате и кратко видео кај мене на инстаграм во reels.