Сигурна сум дека се сеќавате на моето најлесно тесто за пица од сладок компир! Епа еве мал апгрејд: бургер лепчиња од сладок компир! Јас ги направив во мини варијанта за да бидам сигурна дека ќе се испечат. Секако дека потоа ги направив и малку поголеми и со други варијации во составот. Но, сега ќе се задржам на овој рецепт. Од состојките, ми излегоа 4 мини бургерчиња и навистина беа превкусни и прелесни за правење. А, ако ја зголемите дозата, можете да направите мезе за вашата следна седенка 🤣
![бургер лепчиња од сладок компир](https://marijamarijamarija.com/wp-content/uploads/2022/05/IMG_9830-768x1024.jpeg)
![бургер лепчиња од сладок компир](https://marijamarijamarija.com/wp-content/uploads/2022/05/IMG_9568-768x1024.jpeg)
Уште неколку факти за слаткиот компир
Овие бургер лепчиња од сладок компир, освен што се многу вкусни, исто така се и многу здрави! Слаткиот компир е супер храна за подобрување на имунитетот, гастроинтестиналниот тракт и функцијата на мозокот!
Слаткиот компир содржи влакна и антиоксиданси кои поттикнуваат раст и развој на добра цревна бактерја, со што помагаат за поздрави црева. Исто така, богати се со бета-каротен и антоцијани, антиоксиданси кои можат да помогнат спречување на губење на видот и подобрување на здравјето на очите. Бета-каротенот, може да се претвори во витамин А со што помага во подобрување на целокупнио имунолошки систем!
![бургер лепчиња од сладок компир](https://marijamarijamarija.com/wp-content/uploads/2022/05/IMG_9565_jpg-edited-scaled.jpeg)
Како да ги јадете овие мини бургер лепчиња од сладок компир
За појадок можете да ги јадете со:
– тофу омлет, хумус и авокадо;
– веганска павлака, домати, краставица и маслинки;
– путер од јатки и свежо овошје;
– стопен вегански кашкавал, печурки, брокула и домашен кечап;
За ручек можете да ги јадете со:
– фалафел, свеж зеленчук и сос од домат;
– ќофтиња од леќа, хумус и домат;
– краставица, авокадо, маслинки, млад кромид, парчиња димено тофу и сос од домат;
![burger lepchinja od sladok kompir](https://marijamarijamarija.com/wp-content/uploads/2022/05/IMG_9840_jpg-edited-scaled.jpeg)
![burger lepchinja od sladok kompir](https://marijamarijamarija.com/wp-content/uploads/2022/05/IMG_9927-edited-scaled.jpeg)
Доколку се уште го немаш пробано моите мини бургер лепчиња од сладок компир, еве прилика! Те охрабрувам, бидејќи се превкусни и секако, здрави. Доколку ги направиш, тагни го мојот инстаграм профил @marijamarijamarija
🍠 Мини бургер лепчиња од сладок компир 🍠
Состојки
- 1 шоља испечен сладок компир испасиран
- 1 шоља брашно од хељда може и со овесно брашно
- 2 к.л. прашок за печиво
- прстофат сол + зачини по вкус
- сусам за од горе
Инструкции
- Загрејте ја рерната на 170.
- Во сад измешајте ги компирот, брашното, зачините и прашокот за печиво.
- Мешајте со вилушка додека да добиете топка и потоа малку замесете со рака.
- Не месете премногу за да не добиете тврсо тесто.
- Исечете го на 4 еднакви делови, формирајте топчиња и оставете ги да отстојат 10-тина минути.
- Премачкајте ги со малку маслиново и наросете сол и сусам (овој чекор е опционален, но препорачлив).
- Печете 20-тина минути (зависно од рерната, можеби и малку подолго).
- Оставете ги да се оладат и почнете со редење на вашите бургерчиња/сендвичиња 🍔
Вкупно парчиња: 4
(препорачана порција: 2 парчиња)
Нутритивни вредности од порција:
Калории:
Протеини:
Јаглехидрати:
Масти:
Влакна:
* Јас користам мерилки, ви препорачувам да набавите, многу се корисни а воопшто не се скапи. ** с.л. = супена лажица - ќе го користам како кратенка *** к.л. = кафена лажичка - ќе го користам како кратенка **** Времето на печење многу зависи од рерната. Погледнувајте ги по 15 минути печење.
‼️Сите фотографии се оригинални, направени од страна на МаријаМаријаМарија, и истите не смеат да се користат без претходно одобрување. Доколку сакате да користите некои од моите фотографии, слободно исконтактирајте ме 💌 .