![тофу ќофтиња](https://marijamarijamarija.com/wp-content/uploads/2023/03/IMG_0669-edited-scaled.jpg)
Со моите тофу ќофтиња сега можете да јадете ќофтиња, но без месо. Слично како и моите ќофтиња од леќа, така и овие се прават брзо и лесно со многу едноставни, здрави и целосни состојки. Но поважно, многу се вкусни, здрави, задоволувачки и полни со растителни протеини.
Тофу во секое време
Тофу се трудам да јадам често, бидејќи е супер извор на растителни протеини. И како што неколку пати сум кажала: мааната на тофуто е што нема вкус, а предноста на тофуто е што нема вкус. Можеби звучи чудно, но, тофуто ќе ви биде онолку вкусно колку што ќе го зачините и приготвите. Еве некои од моите супер рецепти со тофу:
1️⃣ Тофу кајгана
2️⃣ Тофу омлет
3️⃣ Грчка салата со тофу и авокадо
4️⃣ Матено тофу намаз
![тофу, чиа, магдонос, брашно наут, нутритивен квасец, маслиново, зачини](https://marijamarijamarija.com/wp-content/uploads/2023/03/IMG_0637-768x1024.jpg)
![смеса за ќофтенца од тофу](https://marijamarijamarija.com/wp-content/uploads/2023/03/IMG_0638-768x1024.jpg)
![tofu kjoftinja](https://marijamarijamarija.com/wp-content/uploads/2023/03/IMG_0641-768x1024.jpg)
Да се вратиме на моите тофу ќофтиња
Зошто да ги направите?
Затоа што се супер вкусни и супер здрави. Прво, тофуто е извор на антиоксиданси. Богато е со изофлавони, па игра улога во намалувањето на нивото на холестерол и го поддржува здравјето на срцето, односно може да придонесе во заштита од одредени срцеви заболувања. Од останатите придобивки на тофуто:
- може да помогне да се намали губењето на коскената маса или да се зголеми минералната густина во коските
- може да ја подобри меморијата, вниманието, брзината на обработка на податоците како и целокупната функција на мозокот кај некои возрасни
- може да помогне во намалување на симптомите на менопауза, како што се заморот, нарушувањето во расположението и топлите бранови
- може да го намали ризикот од развој на депресија за време на бременоста и до 28%
Како да ги направите?
Одговорот на ова прашање веќе го знаете. Како и повеќето од моите рецепти, така и овие тофу ќофтиња се прават многу брзо и лесно. Се што ви е потребно е процесор за храна или сецко за да можете убаво да ги сомелете состојките и да ги соедините.
Имаат вкупно 9 состојки, од кои 3 се зачини 😀 Дополнително, освен протеините во тофуто, овие тофу ќофтиња имаат протеини и од брашното од наут и од нутритивниот квасец. И практично, тоа се состојките.
Инаку, можете да ги печете во air-fryer, во рерна или пак доколку сакате можете да ги пропржите на маслиново. Можете да ги подготвите и сервирате со доматен (или маринара) сос, пире од компири или како во мојот случај со пире од морков (рецепт наскоро) Целиот рецепт и начинот на подготовка ви е напишан подолу, а имате и кратко видео кај мене на инстаграм во reels.
![тофу ќофтиња](https://marijamarijamarija.com/wp-content/uploads/2023/03/IMG_0668-768x1024.jpg)
![тофу ќофтиња](https://marijamarijamarija.com/wp-content/uploads/2023/03/IMG_0673-768x1024.jpg)
Доколку сакаш ќофтиња, но не јадеш мелено месо или едноставно сакаш да пробаш нешто ново, пробај ги моите тофу ќофтиња. Те охрабрувам, бидејќи се супер вкусни и многу здрави. Плус, богати со протеин. Доколку ги направиш, тагни го мојот инстаграм профил @marijamarijamarija или остави ми коментар под овој пост.
🧆 Тофу Ќофтиња 🧆
Oпрема
- сецко / процесор за храна / вилушка
Состојки
- 300 гр. Тофу
- 2 с.л. Брашно од наут или овес, хељда
- 2 с.л. Маслиново масло
- 1 китка Магдонос
- 2 с.л. Чиа семки, сомелени накиснати во 6 лажици вода
- ½ к.л. Сол
- 1 к.л. Куркума
- 2 с.л. Нутритивен квасец
- ½ к.л. Оригано
- 1 к.л. Димена пипер и други зачини по вкус
Инструкции
- Најпрво направете го Чиа „јајцето“ со тоа што ќе го накиснете чиа семето во вода.
- Во процесор за храна исцепкајте го и додадете го тофуто, зачините и магдоносот и пулсирајте неколку пати за да се соединат. Ова можете да го направите и во сецко, или еднставно се ситно да исецкате со нож, а тофуто да го издробите со вилушка.
- Извадете го ножот од процесорот и додадете ја чиата, брашното и маслото и убаво промешајте.
- Формирајте ќофтиња (топчиња) и наредете ги на тавче за печење обложено со хартија за печење.
- Печете во претходно загреана рерна на 170, 20-тина миути,
- Можете да ги печете и во air-fryer.
- Послужете ги како додаток со пире од морков, интегрален ориз, хељда или во салата.
Вкупно парчиња: 12 ќофтиња
(препорачана порција: 6 парчиња)
Нутритивни вредности од порција (** без додатоци):
Калории: 352,5 kcal
Протеини: 22,1 гр.
Јаглехидрати: 13,2 гр.
Масти: 26,2 гр.
Влакна: 8,3 гр.
* Јас користам мерилки, ви препорачувам да набавите, многу се корисни а воопшто не се скапи. ** к.л. = кафно лажиче - ќе го користам како кратенка ***Времето на печење зависи од типот и моќноста на рерната. Проверувајте да не ви загорат или пак да не случајно не се добро испечени
‼️Сите фотографии се оригинални, направени од страна на МаријаМаријаМарија, и истите не смеат да се користат без претходно одобрување. Доколку сакате да користите некои од моите фотографии, слободно исконтактирајте ме 💌 .