Торти и тартови

Оваа чоколадна торта со леќа е одговор на сите загрижени „чокољупци“ :)) Но, ако сме искрени, сите сакаме чоколадна торта, нели? Особено ако е сочна, со богат чоколаден и сладок вкус. Но, често пати токму таква торта знае да ни предизвика вина или грижа на совест…

Иако веќе имам две други чоколадни торти, (една со киноа, и една роденденска), оваа чоколадна торта со леќа е уште еден начин да уживаш во омилениот десерт без чувство на вина, и тоа со токму таа неочекувана, но неверојатно вкусна и здрава состојка… леќа! Оваа чоколадна торта со леќа е здрава, сочна и богата со протеини, а никој нема да ја забележи „тајната“ состојка.

Епа кога една торта е здрава, тогаш дефинитивно треба да се проба, нели? Не се двоуми, свари си црвена леќа и направи си го ова чоколадно задоволство уште денес.

П.С. мајка ми не јаде леќа (знам, чудно) но оваа торта и беше превкусна и воопшто не ја почувстува леќата!

Да бидеме реални, сите знаеме како се прави тирамису, и ова дефинитивно не е класично тирамису. Ова е поинаков рецепт, без бискоти, без шеќер, минимално засладен и супер алтернативна верзија на овој италијански класик.

Не велам дека не треба да си направите и регуларно тирамису, но велам дека ова рецептче го заслужува вашето внимание, и треба да се проба особено во периодот на пости.

Италијански класик во малку поздрава варијанта

Иако кога почнав да го мислам ова тирамису, бев малку скептик. Зошто да го направам, како ќе излезе… Целата убавина на тирамисуто се бискотите, и крем сирењето… Но, сепак решив да го направам и мислам дека не погрешив! Има навистина симпатичен вкус, крамасто е и се прави едноставно. Се што ви треба е процесор за храна за да ги направите кремовите.

Зошто ова тирамису на мој начин?

Затоа што понекогаш сакаме да имаме поздрава варијанта од некој десерт. Плус, затоа што е навистина многу кремасто и вкусно и се прави прилично лесно.

Сепак, за сите оние кои не се љубители на кафе (имам еден таков дома), тогаш ви препорачувам да ја направите мојата 🥕 Сирова торта од морков 🥕

Но, да се вратиме на моето тирамису, целиот рецепт и начинот на подготовка го имате подолу во рецептот. А имате и кратко видео кај мене на инстаграм во reels. Како и секогаш, доколку го споделите или зачувате, многу ќе ми значи ♥️

Залак што ве носи до кикирики рајот

Можеби затоа што сум ЕПТЕН фан на путер од кикирики, па овој чизкејк со путер од кикирики мене ми беше нежна, декадентна експлозија од вкус!

Освен што нема глутен и е природно засладен со урми, овој чизкејк со путер од кикирики има кремаста база со нота на карамела и многу, ама многу кремаст и сочен фил.

Плус, освен што е неверојатно вкусен, сите состојки се целосни и добри за вас! Полн е со здрави масти, од оние што ви се потребни во исхраната.

Мојот омилен путер од кикирики

Недоброј пати имам кажано, но пак ќе повторам. За мене, најдобар путер од кикирики е дефинитивно Crux. не само затоа што е природен, без додатоци и вистински кремаст. Туку има специфичен и длабок вкус на кикирики, како што ретко кој путер има. (**отвара тегла и си сркнува лажиче**)

Како да го направите овој чизкејк со путер од кикирики

Иако веганските чизкејк торти ги бие глас дека се прават долго, сепак јас не се сложувам. Овој чизкејк (како и повеќето други мои) се прави за 30тина минути. Со тоа што, наместо да го печете, треба да го ставите во замрзнувач убаво да се стегне.

За да го направите, потребен ви е само процесор за храна што ќе може убаво да ги сомеле индиските ореви и да ги претвори во оваа кремаста магија.

Инаку, ова е мојот прв десерт за 2023 и мислам дека супер ја почнав годината. Доколку сакате малку повеќе блажина, можете да додадете некој засладувач, но според мене ова е идеален вкус и не треба ништо повеќе!

Целиот рецепт и начинот на подготовка го имате во рецептот подолу а имате и кратко видео кај мене на инстаграм во reels.

Овој сиров чизкејк со малина и чиа е уште еден постар рецепт објавен првично на мојот инстаграм профил, но толку е освежувачки и здрав, што морав да ви го објавам и тука. 😍

Зошто велиме „здрави десерти“ кога сепак се доста калорични?

Апсолутно е неточно дека здравата храна нема калории. Напротив, калории има буквално во сè што консумираме. Целата поента на моите десерти е да не се консумира преработен шеќер, преработени производи, емулгатори, вештачки бои и ароми и останати додатоди што ги има во спакуваните десерти на рафтовите.

Плус, здравите десерти можете да ги балансирате со додавање на макронутриенти, за разлика од готовите производи со долг век на полица.

Животот нема поента без десерт

Иако многумина преферираат солена храна, сепак, секој ужива во добар десерт, барем повремено. Епа овој чизкејк со малина и чиа не само што е добар, туку е одличен! Може да го направите и послужите како торта, или пак, како во мојот случај, барови.

Како да го направите овој чизкејк со малина и чиа

Прилично лесно, во процесор за храна, сецко или блендер. Ви треба и тавче и секако, замрзнувач. Нема голема филозофија. Сепак, начинот на подготовка во детаљи ви е објаснет во рецептот подолу. Како и за сите сирови чизкејк торти или барови: прво ја правите базата, па замрзнувате. Па го правите филот (кремот) па посвторно замрзнувате. На крај го правите топингот и откако ќе се стврдне па отпушти, спремна е за послужување.

Среќен ми роденден!

Колку години полнам не е важно. Она што е важно е дека чоколадна роденденска торта до сега за роденден си немам направено. Вообичаено правам чизкејк (првично тоа ми беше намерата и годинава) ама некако решив дека ќе направам чоколадна торта, во една малку поздрава варијанта…

И така! Признавам, задоволна сум со изборот што го направив. Happy Birthday to me! 🎉🎉

Иако не мора се што јадеме да биде секогаш ултра здраво (добро е, доколку можеме да се придржуваме до принципот 80:20), сепак, поубаво се чувствувам кога знам дека тоа што го јадам освен што е вкусно, е направено од добри состојки. Така, освен што ќе имам малку помалку грижа на совест, ќе можам поопуштено да уживам во вкусот и секако – ПРИГОДАТА!

Готова за 30 минути

И дечки, тоа е тоа што ви треба – торта готова за 30тина минути, да ја направите наутро и да ви биде готова и да не ја мислите после! Така беше и во мојот случај. Додуша, во мојот случај беа 3 мини торти, но тоа беше поради тоа што во хаосот со реновирање, не можев да го најдам големото тавче за печење, па тортава ја правев во мали тавчиња на неколку пати. Инаку, ја испеков рано утрината, па попладнето само ја декорирав и снимав, сликав за конечно да ја исечам и пробам…. 🤣🤣

А кремот…

Кремот е must-have!! Богат, декадентен, со многу какао и путер од кикирики… Ред протеини, ред антиоксиданси, ред тесто, ред крем… 😋🤤 Пробајте го, нема да зажалите. Дури можете да го направите засебно и да го искомбинирате со друго колаче или тортиче…

Љубители на Ferrero Rocher, обединете се!

Мојата домашна фереро торта без печење е вистински деликатес: богат вкус на лешник и какао, крцкава и мека, сочна и блага. Да, поздрава опција, но бајаги интензивна (и калорична)!

Базата има преубав какао вкус а полнењето е навистина декадентно! Путерот од лешник ја прави навистина неодолива!

Ова без двоумење треба да биде изборот на торта за некој следен роденден или прослава. Толку е вкусна што ќе ве одушеви и вам а и сите што ќе ја пробаат. Вкусот е дефинитивно познат – фереро, но во торта варијанта.

Добро познати вкусови

Има некои десерти што се добро познати за повеќето. Овде може да ги набројам Баунти, Твикс, Марс, Сникерс, Рафаело и секако, Фереро. Но, доколку можете, добро е да не купувате процесирана храна, што значи дека секогаш е подобро овие десерти да си ги направите дома. Таков е случајот и со оваа торта. Вкусот многу потсеќа на познатиот чоколаден десерт а е многу подобра опција за вас.

Комбинацијата од лешник и урми дава еден препознатлив „брауни“ вкус на базата, надополнета со филот од лешник го комплетира целокупниот неодоливо сладок вкус (со посебен акцент на сладок).

Тортава прв пат ја правев лани, и оттогаш ја направив уште неколку пати. Но, да бидам искрена често пати се воздржувам да ја правам, бидејќи мнооооогу брзо се јаде. 🤷🏻‍♀️

Кога животот ти дава лимони, направи го овој лимон тарт!

Освежителен, минимално природно засладен, со крцкава кора и меко полнење, ете таков е овој лимон тарт. Фантастичен!

Да почнам од базата. Ова е веројатно една од највкусните што ќе ги пробате – навистина! Планирам да ја развијам и во барови, ете толку ми е вкусна! Нема глутен а вкусот мислам дека е толку посебен поради комбинацијата од јатки, но и фактот што овој пат ги испеков.

А полнењето… Кисело, благо, меко, сочно и освежително. Мислам дека со овие зборови доволно се опишува, за се повеќе, треба да се проба!

Едноставни здрави состојки

Комбинацијата од овесни снегулки, печени бадеми и ореви, збогатена со урми, ванила и кора од лимон е навистина, навистина превкусна! Дополнета со комбинацијата од кокосов крем и лимон for the win!

Овој лимон тарт ќе биде вашиот омилен летен десерт

Најважно од се (освен што е превкусен) е што се прави релативно брзо и едноставно, не се пече и моќе долго да стои во замрзнувач. Пред да го послужите, извадете го кратко да се отпушти, но препорачувам да не стои долго, за да не испушти премногу вода.

Дефинитивно мислам дека сето ова го прави овој лемон тарт совршен десерт за пролетните и летните денови што престојат.

Прв пат ги објавив на мојот инстаграм профил со видео, па потоа ги објавив и како пост ама ги направив толку многу пати затоа што се навистина МНОГУ вкусни!

Како и се што правам па така и овие лимон чизкејк барови се направени со здрави и целосни состојки, немаат глутен и се природно засладени со урми, сируп од урми и јаворов сируп Количината на засладувачите е минимална, бидејќи сакав да доминира вкусот на лимон. А за кремастата структура нема да коментирам, свеленкаста и мека, се топи – баш како што треба еден сиров чизкејк да биде.

Ова е дефинитивно одличен летен рецепт 🌼☀️

За мачата веќе имам објавено детален пост, зошто е добра и зошто треба да ја пиеме, па да не се повторувам: одлична е и за телото и за умот, го подобрува вашето здравје и вашето расположение.

А овој мача чизкејк има сочна јаткаста база, кисело слаткаст крем, со блага нота на мача и преубава зелена боја! Доколку сте љубител на интензивен вкус на мача, можете да ставите и повеќе во кремот.

Инаку, за убавиот вкус на тортата, секако дека зависи и типот на мачата што го користите. Јас дома имам четири видови што ги користам (мора се да се проба, нели) и на вкус дефинитивно број 1 ми е мачата на Моya Matcha а потоа и на Rawnice којашто за жал не е секогаш достапна.

^{Но, бидејќи со Моya Matcha сме долго пријатели, со искористување на кодот „МММ10“ при порачка на некој од произвидуте, добивате 10% попуст.}