Овие вегански кроасани се еден мој постар рецепт што до сега не ми беше објавен на сајт. Зошто – ни замата не знам. Но, се си има своја причина, па така еве им дојде редот.

Океј, овие вегански кроасани не се класични кроасани со путер, но се далеку поздрава опција со целосни состојки. Посни се, крцкави од надвор и меки и сочни внатре и одлично одат со кафе или чај.

Можете да ги јадете за појадок, ужина па дури и вечера. А мирисот на цимет ќе ви го исполни домот додека се печат.

Мене ми се супер опција во есенските и зимските денови – иако признавам, знам да си ги направам и во лето 🫢

Играјте си со полнењето

Јас до сега ги имам правено во најразлични варијации и полнења: со црно чоколадо, со домашна нутела, со чиа џем, со чоколаден крем, со замрзнати боровинки – и во сите комбинации излегуваа превкусни! Последно, овие вегански кроасани ги направив со Mama’s Food какао кремот од тиква и повторно беа превкусни.

Инаку, пишувајќи го овој пост, сфатив дека истото тесто може да се направи и во форма на штрудла, па ќе пробам следен пат да ги наполнам со смеса од суво овошје, за бадник! Мислам дека ќе бидат полн погодок.

Секако, доколку пробате некоја друга варијанта пред мене, оставете ми коментар со импресии.

Како да ги направите овие вегански кроасани?

Како што би правеле и кифлички, само без путер, без јајца, без масло. Всушност – многу полесно од традиционален кроасан, којшто да бидеме реални – се прави многу тешко. Па така, доколку сакате едноставна а здрава варијанта – ова е тоа. Целиот рецепт и начинот на подготовка го имате во рецептот подолу, а имате и кратко видео од подготовката кај мене на инстаграм во reels.

Доколку се уште ги немаш пробано и направено моите вегански кроасани, еве прилика. Те охрабрувам, бидејќи се прават прилично лесно, здрави се и многу вкусна. Плус, можете да си играте со полнењето и секој пат да добиете различен вкус! Доколку ги направиш, тагни го мојот инстаграм профил @marijamarijamarija или остави мо коменар под овој пост.

Печати рецепт