Пред да почнам да зборувам за моите тако тортиљи од лен, да дадам краток осврт на Такото – или едно од најпознатите традиционални Мексикански јадења. Мексиканските тако тортиљи се оригинално од пченкарно брашно (и само такви јадев додека бев во Мексико). Исто така, најчесто тако филот е со многу зачинето месо и лут сос, но на мое големо изненадување имаа и вегански опции.

Јас, дома вообичаено ги правам овие тако тортиљи од лен – поради тоа што се прават многу брзо и лесно и пред сѐ, поради придобивките на лененото семе (омега масни киселини, диететски влакна, антиоксиданси…)

За да ги направите буквално ви треба само ленено семе, вода и зачини. Зачините ќе ви го диктираат вкусот и можете секој пат да ставата различни комбинации. Од овој рецепт излегуваат 8 средно-мали тако тортиљи што потоа можете да си ги наполните со што ви душа сака. Јас многу сакам фил од леќа и ореви, свеж спанаќ, авокадо и домат.

Зрнца здравје

Лененото семе или ситните моќни зрнца, е разноврсна состојка која може да го подобри вкусот и текстурата на речиси секој рецепт. Можете да го додадете во утринското смути или да си направите пудинг од лен. Исто така е одличен додаток на тестото за палачинки, домашните веге хамбургери, па дури и овесна каша. Но поважно, лененото семе е преполно со хранливи материи и има многу придобивки за здравјето. Дефинитивно за лененото семе ќе напишам посебен пост кадешто ќе ги вклучам сите придобики што ги има за вашето здравје, но сега ќе набројам само неколку:

Само една порција лелено семе обезбедува добра количина на протеини. Исто така, содржи голема количина на диететски влакна. А најважно од се, одличен извор е на омега-3 масни киселини, заедно со неколку важни витамини и минерали. Може да го намали нивото на холестерол, и крвниот притисок. Исто така, може да го стабилизира нивото на шеќер во крвта. Ленот може да помогне и во одржување или губење на тежината.

Тортиљи дома, во секое време

Без двоумење, овие тако тортиљи од лен треба да си ги направите дома. Можете да ги подготвите од вечер па да ви бидат готови за следниот ден. Единствено важно при подготовката е да имате нелепливо тавче за палачинки. Не ви треба масло, бидејќи лененото семе си пушта масло. А, доколку повеќе сакате бурито од тако, слободно направете ги поголеми. Место 8 ќе добиете 4 што е количина за 4 порции.

Доколку си љубител на мексиканска храна, а особено на такоси, тогаш дефинитивно треба да ги пробаш моите тако тортиљи од лен. Те охрабрувам, бидејќи се прават многу лесно и едноставно а се многу здрави, нутритивно богати и вкусни. Доколку ги направиш, тагни го мојот инстаграм профил @marijamarijamarija или остави ми коментар под овој пост.

Печати рецепт