Океј, солена гранола звучи тотално невообичаено, па дури можеби и чудно. Како би јаделе солена гранола? Во што би ја додале? Хмм.. Би рекла, би ја јаделе исто како и секоја друга гранола – со лажица 🤣 Ајде сега шала на страна, затоа што оваа гранола дефинитивно вреди да се проба. Може да се јаде со неутрален (или закиселен) јогурт, како додаток во сендвичи, паста, салати. Многу е вкусна, верувајте! Но, освен тоа, исто така е нутритивно богата, полна со омега-3 и други здрави масти, влакна, протеин, магнезиум, витамин Е, Б3, Б6, антиоксиданси и минерали.
![solena granola](https://marijamarijamarija.com/wp-content/uploads/2024/02/IMG_5436-768x1024.jpg)
![solena granola](https://marijamarijamarija.com/wp-content/uploads/2024/02/IMG_5439-768x1024.jpg)
![solena granola](https://marijamarijamarija.com/wp-content/uploads/2024/02/IMG_5441-768x1024.jpg)
Додадете му „crunch“ на секое јадење
Ако сте како мене и сакате секогаш нешто крцкаво во оброците, тогаш оваа гранола е дефинитивно за вас! Дава предобар солен крцкав шмек и е супер додаток во кој било оброк. Плус, ако (пак како мене) секогаш имате залиха од сварена киноа, тогаш дефинитивно станете и направете ја гранолава. Се прави навистина брзо и лесно, а брзо и се пече – готова е за 10-тина минути. А еве и неколку идеи како да ја јадете:
🥑 На авокадо тост,
🥗 Во салата,
🍝 Во паста,
🍛 Со рижото,
🍚 Со мојот солен печен овес,
🍶 Со јогурт,
🥣 Со тарана,
🥜 За ужинка место грицки
Ова се неколку идеи што први ми паднаа на памет, мислам дека ќе ми текнат уште, ама ако ја направите и ако ви дојде инспирација за уште некое комбо, споделете го во коментар под овој пост.
![солена гранола](https://marijamarijamarija.com/wp-content/uploads/2024/02/IMG_5455-768x1024.jpg)
Доколку сакате пикантно или луто, слободно додадете од вашиот омилен лут сос или заменете ја томато пастата со Gochujang паста (јас тоа го направив) и во двете варијанти е врвна! Така што… скролнете надолу во овој пост за да го видите целиот рецепт, а секако, кај мене на инстаграм во reels имате и кратко видео од подготовката.
![солена гранола](https://marijamarijamarija.com/wp-content/uploads/2024/02/IMG_5453-768x1024.jpg)
![солена гранола](https://marijamarijamarija.com/wp-content/uploads/2024/02/IMG_5462-768x1024.jpg)
![солена гранола](https://marijamarijamarija.com/wp-content/uploads/2024/02/IMG_5468-768x1024.jpg)
Доколку и ти како мене сакаш крцкави додатоци во јадењата, тогаш дефинитивно мораш да ја пробаш мојата солена гранола. Те охрабрувам, бидејќи веројатноста и ти да се навлечеш е ГОЛЕМА. Многу е вкусна и навистина лесно се прави. Доколку ја направиш, тагни го мојот инстаграм профил @marijamarijamarija
🥄 Солена Гранола 🥄
Состојки
- 1 шоља Сварена киноа
- ½ шоља Овесни снегулки
- ¼ шоља Семки тиква
- ¼ шоља Семки сончоглед
- ⅛ шоља Сусам
- 1 с.л. Нутритивен квасец
- 1 с.л. Соја сос
- 1 с.л. Доматно пире
- 1 к.л. Зеленчуков зачин
- 1 к.л. Димена пипер
- 1 к.л. Лук во прав
- 1 к.л. Сув власец
- 1 к.л. Сув копар
- 1 к.л. Куркума
- 1 к.л. Оригано или друг избор на зачини по вкус
Инструкции
- Во подлабок сад ставете ги претходно сварената киноа, овесните снегулки, семките и сусамот и убаво промешајте.
- Додадете го соја сосот и доматната/лутата паста и промешајте.
- Додадеете ги и зачините и нутритивниот квасец и убаво промешајте за смесата сосема да се соедини.
- Наредете тенок слој на тавче за печење обложено со хартија за печење и печете 7-8 минути во претходно загреана рерна на 160.
- Разбуричкајте ја со лажица за да се испече од двете страни и печете уште 7 минути (со повремено гледање, бидејќи секоја рерна е различна)
- Оставете целосно да се олади и складирајте.
Вкупно парчиња: 30 лажици
(препорачана порција: 2 лажици)
Нутритивни вредности од порција:
Калории: 61,9 kcal
Протеини: 2,58 гр.
Јаглехидрати: 5,02 гр.
Масти: 3,16 гр.
Влакна: 1,43 гр.
* Јас користам мерилки, ви препорачувам да набавите, многу се корисни а воопшто не се скапи. ** с.л. = супена лажица - ќе го користам како кратенка *** к.л = кафена лажичка - ќе го користам како кратенка
‼️Сите фотографии се оригинални, направени од страна на МаријаМаријаМарија, и истите не смеат да се користат без претходно одобрување. Доколку сакате да користите некои од моите фотографии, слободно исконтактирајте ме 💌 .