🍮 Најлесното трослојно колаче од урми 🍮

Кога сакате нешто МНОГУ благо а да нема преработени шеќери, ова брзинско трослојно колаче од урми е совршено за вас. Има само 6 состојки и се прави многу лесно. Од оваа количина ми излегоа 15 парчиња, ама моја препорака е да сечете помали парчиња и да добиете 30 затоа што, верувајте многу е благо. Практично ова е вистинска калориска бомба!

Се чини дека веднаш штом го објавив на мојот инстаграм профил, ова најлесно трослојно колаче од урми стана еден од омилените и најзачувувани десерти. А на мое големо задоволство, добив и добар фидбек од многумина што веднаш го направија и пробаа.

Карамел од урми

Инаку карамелот од урми ми е еден од најчесто употребуваните додатоци во рецепти (не е исто со сируп од урми) и за него решив да посветам целосен пост. Причината е следна: стои долго во фрижидер, може сам по себе да е десерт или пак да биде дел од други десерти. Јас ги практикувам и двете опции.

Последно предупредување

Да, ова е навистина последно предупредуање: внимавајте на изедената количина од ова трослојно колаче од урми 😀

Зошто е толку вкусно? Затоа што првиот слој е комбинација од ореви, какао и урми. Вториот слој е комбинација од бадеми, ванила и урми. Третиот слој е карамел. И сосем за крај прелив од црно чоколадо.

Одлично оди со кафе и чај и доколку сте внимателни и имате силен карактер за да не подлегнете на вкусот и ако не дозволите вкусот комплетно да ве обземе, стои долго и во фрижидер. 😆 Со среќа!