Супи, чорби и манџи

Оваа чорба од домати ме потсетува на далматинската juha od rajčica, доматна супа што далматинците ја прават со ориз. Верувале или не, на еден од одморите во Хрватска, ја јадев можеби секој ден. Од тогаш наваму, ја правам оваа моја верзија, исто така превкусна, и дури и уште поздрава. Плус, мојата љубов кон супи, чорби и манџички е вечна, како што можете да видите од она што го готвам.

Збор два за доматот

Доматите се богати со ликопен – којшто им ја дава црвената боја и ги штити од ултравиолетовите зраци на сонцето. Па така, ликопенот помага во заштита на клетките од оштетување. Доматите се богати и со калиум, витамини Б и Е и други хранливи материи.

Инаку ликопенот е антиоксидант што се бори со слободните радикали што ги оштетуваат клетките и влијаат на имунолошки систем.

Поради тоа, храната богата со ликопен, како што се доматите, ја намалува можноста од многу заболувања како што се рак на белите дробови, желудникот или простатата, заболувања на панкреасот, дебелото црево, грлото, устата, градите и грлото на матката.

Мало, црвено и многу моќно!

Збор два и не се баш доволни, па еве се што треба да знаете пред да ја подготвите мојата чорба од домати (и секако, зошто треба редовно да си ја правите).

За здраво срце

Ликопенот, исто така, може да помогне во намалувањето на нивото на ЛДЛ, или „лошиот“ холестерол, како и за подобрување на крвниот притисок. Содржи витамини Б и Е и антиоксидансите наречени флавоноиди, што можат да го зајакнат здравјето на вашето срце.

Кога ќе ја пробате мојата чили леќа, нема да сакате да правите каква било друга леќа. Плус, ако сте љубител на пикантен вкус – тогаш овој ручек е полн погодок за вас. Секако, доколку не јадете луто, едноставно изоставете го во зачините – вкусот и понатаму ќе биде предобат.

Тајната состојка

Ја крстив чили леќа, затоа што е пикантна – односно и ставам неколку зачини што дават лут вкус. Секако, како што напоменав погоре, слободно изоставете ги доколку не јадете луто. Но, тајната состојка во ова јадење, сепак, е томато сосот. Односно, јас леќата не ја варам во вода, туку во доматен сос, што совршено се вклопува со црвената леќа што ја користам за ова јадење, морковот, лукчето и кромидот. И тоа е тоа, нема комплицирани состојки, нема голема филозофија. Брз, лесен и здрав ручек готов за 20-тина минути

Чили леќа без чили?

Нека не ве плаши името, веќе неколку пати нагласив дека поеднакво е вкусна и доколку не ставите чили и хариса. Чилито е добро да се јаде, но не и да се претерува – како впрочем и се останато. Слободно ставете ги зачините што ги сакате (одлично оди со босилек, или нане, и секако, свеж магдонос.

Леќата е инаку уште еден одличен извор на растителен протеин и добро е да ја консумирате често. Уште подобро е ако ја искомбинирате со упте некој извор на протеин како тофу, плус грав и грашок. Јас често ја користам, и од леќа правам се:
– тортиљи/врапови
– ќофтиња
– ролат

А, наскоро ќе го објавам и рецептот за протеинско лепче од леќа 😍🤩

Океј, веќе сите знаеме – Марија многу сака супи и чорби! А, оваа чорба од брокула е совршен оброк, утеха, лек! Зошто? Затоа што брокулата е еден од најмоќните зеленчуци на планетата! Плус, јас најчесто ја правам во комбинација со грашок и спанаќ или блитва за уште побогата нутритивна вредност!

Но, комбинациите за чорба со брокула се бескрајни! Направете ја со морков или со компир. Па дури и во комбинација со карфиол е одлична. Како и да се решите да ја искомбинирате и приготвите, нема да погрешите! Ве уверувам дека мојата чорба од брокула ќе биде еден од оние задолжителни оброци. Еве и зошто:

Брокула: колку повеќе, толку подобро

Освен што има малку калории а многу витамини и минерали, брокулата е еден од оние зеленчуци што има моќ да ви помогне буквално во сè!

Богата е со многу хранливи материи, вклучувајќи диететски влакна, витамин Ц, витамин К, железо и калиум. Исто така, може да се пофали со фактот дека содржи повеќе растителни протеини од повеќето други зеленчуци.

Зелено пакетче од витамини и минерали

Богата е со Витамин Ц, антиоксиданс важен за функцијата на имунолошкиот систем и здравјето на кожата. Само 1/2 шоља (45 грама) сирова брокула обезбедува речиси 70% од потребните дневни вредности. Содржи високи количини на Витамин К1, којшто е важен за згрутчување на крвта и може да го подобри здравјето на коските. Содржи Фолат (витамин Б9), што е особено важен за бремените жени. Фолатите се потребни за нормален раст на ткивото и функцијата на клетките. Богата е и со Калиумот којшто е корисен за контрола на крвниот притисок и спречување на срцеви заболувања. Содржи Манган како и Железо – што е неопходен минерал, којшто има многу важни функции во телото, како што е транспортот на кислород во црвените крвни зрнца.

Се уште тврдам дека “Што ќе ручаме денес” – е едно од најчесто поставуваните прашања во едно домаќинство. И често пати, доколку се нема направено барем ориентационен план од претходниот ден, се завршува со јадење нешто „на брзинка“, „од нога“ или купечко… Токму затоа и покрај што ја имам објавено и на мојот иснтаграм профил, сепак сакам да ја оставам и овде оваа превкусна и нутритивно богата чорба со хељда и зеленчук. Ова е уште една идеја за брз, домашно зготвен, безглутенски и здрав оброк.

Како и поголемиот дел на чорби, супи и манџички, така и оваа можеби не е нај фотогенчна за сликање ама е многу, многу вкусна и здрава. Со овој оброк внесувате многу важни витамини и минерали и што е најважно, хељдата долго ќе ве држи сити.

За хељдата имам напишано по некој збор во неколку различни рецепти, но еве уште една прилика да спомнеме уште некој факт.

Многу сум среќна кога ја дополнувам категоријата супи и чорби со вакви прекрасни, нутритивни и „новокомпонирани“ чорбички како оваа хранлива чорба од наут. Всушност, оваа чорба повеќе спаѓа во категорија „манџички“ но да не навлегуваме во технички детаљи, сите оброци слични на оваа ќе ги најдете заедно со супите и чорбите.

Зошто наут?

Наутот е вид на мешункаст зеленчук којшто спаѓа во исто семејство како и гравот и кикириките. Наутот е познат под повеќе „псевдоними“ како „гарбанзо грав“, „бенгалски грам“, „египетски грашок“ или едноставно – леблебија (кога е во печена форма). Вкусот му е јаткаст, а структурата кремаста. Карактеристично за наутот е што е една од мешунките со доста голем процент на растителен протеин. Но, сепак, наутот е најпознат по тоа што е клучната состојка во хумусот.

Сите придобивки од наутот

Го контролира нивото на шеќер во крвта

Наутот една моќна мешунка којашто помага при контрола на шеќерот во крвта, поради нискиот гликемиски индекс. Ова значи дека телото полека го апсорбира и вари, што помага да се задржи шеќерот во крвта и инсулинот да не се зголеми пребрзо. Ова го прави наутот погоден за дијабетичари.

Помага во варењето

Поради тоа што е богат со диететски влакна (особено растворливи), добрите бактерии во цревата лесно го разградуваат, па дебелото црево може полека да го вари. Плус, јадењето повеќе наут може да помогне да за полесно и поредовно празнење на дебелото црево.

Може да помогнат во намалувањето на холестеролот.

Нутот може да го намали вкупниот холестерол и пред се LDL („лошиот“) холестерол. Ова го намалува ризикот од срцеви заболувања.

Оваа чорба од морков и ѓумбир е она што ви недостасува во вашиот следен оброк! Мислам дека веќе сите сме свесни за здравствените придобивки на ѓумбирот, но ајде да повториме некои: има анти-инфламаторско дејство и ги намалува болките при артритис, го намалува нивото на шеќер во крвта, го намалува нивото на холестерол, го забрзува варењето и го намалува гадењето, односно го стабилизира стомакот.

А во комбинација со морков, лук и куркума како во оваа чорба од морков и ѓумбир, станува еден прекрасен и хранлив ручек.

Морков: сите придобивки

Освен што е крцкав, вкусен и многу хранлив, морковот е особено добар извор на бета-каротен, влакна, витамин К1, калиум и антиоксиданси. Но тоа не е се!

Морковите го зајакнуваат имунитетот, бидејќи се богати со витамин Ц. Витаминот Ц исто така му помага на вашето тело да внесе и подобро да го искористи железото и да спречи инфекции.

Морковите се одлични против констипацијата (запекот). Исто така, можат да помогнат во контролата на дијабетесот, бидеји се богати со диететски влакна. Влакната помагаат во одржување на нивото на шеќер во крвта. Плус, полни се со витамин А и бета-каротен. Помагаат во зајакнување на коските, бидејќи се богати и со калциум и витамин К.

Синтеза на вкусови

Оваа чорба од морков и ѓумбир е навистина неверојатна синтеза од вкусови. Куркумата (за неа во друга прилика) и дава посебен шмек.

Настана како една од моите комбинации на супи и чорби и веднаш ја објавив на мојот инстаграм профил. Инаку, како и за сите чорби, густината ја регулирате со додавање на вода. Односно, доколку сакате чорбата да е погуста, ставете помалку вода.

Колку што е летото убаво за свежи салати, толку е зимата убава за чорби, супи и манџички, а оваа чорба од карфиол е уште една потврда за ова. Карфиол МНОГУ сакам а оваа супа е толку едноставна, вкусна и здрава, што ќе сакате да си ја правите секој ден, не само во зима.

Зошто Карфиол?

Затоа што карфиолот е еден многу моќен зеленчук со многу малку калории а многу витамини. Всушност, карфиолот ги содржи сите витамини и минерали што ви се потребни. Богат е со: диететски влакна, витамин Ц, витамин К, витамин Б6, фолат, калиум, магнезиум, фозфор… И сето ова со само 25 калории на 100 грама. Ова значи дека можете да изедете поголема количина што ќе ве најаде а да бидете во калориски дефицит. Интересно, нели 😊

Исто така, карфиолот може да се користи како замена на житарките и мешунките во вашата исхрана. И уште една примена – доколку минимално го обарите и замрзнете, можете да го користите како замена за банана во вашето смути. Ја дава истата кремаста структура а има значително помалку калории. А сега малку за мојата чорба од карфиол. Прв пат ја правев зимава, кога ја објавив на мојот инстаграм профил, и некако многу брзо ми стана фаворит. Јас лично често правам чорби и супи од се и сешто, и голем дел ќе се најдат овде на сајтов.

Доколку сакате да биде погуста, ставете помалку вода. Моја препорака е задолжително да додадете куркума – и поради придобивките и поради вкусот.