🍅 Чорба од цвекло 🍅

Мене чорбите ми се храна за душа или “ultimate comfort food” и чорби правам од сè, па така настана и оваа чорба од цвекло. Има преубава јака розово-црвена боја (баш е christmas-friendly, може да оди и во категоријата Празнични рецепти). Плус, е супер вкусна и многу здрава. Јас ја правам само со три состојки: цвекло, црвен кромид и лук. Мојата тајна е печењето на зеленчукот. Количината на зеленчук и вода и зачините се по сопствен вкус.

Неговото височество: цвекло

Освен по препознатливата темно црвена боја, цвеклото е преполно со есенцијални хранливи материи. Извор е на влакна, фолат (витамин Б9), манган, калиум, железо и витамин Ц. Сето ова има бројни здравствени придобивки, вклучително и подобрување на протокот на крв, намалување на крвниот притисок и зголемени перформанси при вежбање.

Во 100 грама има само 43 калории, а количината на влакна што ја содржи помага да се чувстувате сити подолго време. Вкусно е свежо, во салата, закиселено, испечено како додаток со друг зеленчук или како во овој случај – во чорба!

Чинија љубов

Оваа чорба од цвекло е чинија љубов во вистинската смисла на зборот. Убава на око, убава на вкус и неверојатно можна за здравјето! Буквално не постои причина да не ја направите. Истово го кажав и кога прв пат ја објавив на мојот инстаграм профил.

Ова инаку го напоменувам во секој објавен рецепт за супа или чорба – густината ја регулирате со додавање на вода. Односно, доколку сакате чорбата да е погуста, ставете помалку вода.