Киноа правам на многу начини, и оваа печена киноа е една од многуте мои варијации. Вкусна, здрава и прелесна за правење!

Киноа се трудам да јадам барем два пати во неделата – поради нејзината богата нутритивна природа. освен што киноата се смета за целосен извор на протеин, бидејќи ги обезбедува сите девет есенцијални амино киселини, таа е одличен извор на неколку минерали, вклучувајќи манган, фосфор, бакар, фолат, железо, магнезиум и цинк. Исто така, Јаглехидратите во киноата се состојат главно од скроб, нерастворливи влакна и мали количини шеќер и отпорен скроб.

Некои истражувања покажуваат дека киноата може да помогне во намалувањето на холестеролот во крвта, шеќерот во крвта како и триглицеридите. Исто така, помага во процесот на слабеење, нема глутен и е богата со антиоксиданси. Со причина се верува дека киноата е супер-храна, нели?

Како да ја направите мојата печена киноа

Во еден сад (секако, огноотпорен што може да оди во рерна). Убавината на овој рецепт е што не треба да валкате неколку тавчиња, тенџериња и садови. Правите се на едно место, склопувате за буквално 5 минути и печете 25 минути.

Буквално толку. За 30 минути имате Многу здрав и избалансиран ручек којшто исто така можете да си го носите и на работа, на пикник или кадебило, доколку го спакувате во сад со капак.

Јас ја правев со домати, спанаќ, тофу, маслинки и доматен сос, но вие можете да пробате и со друг избор на зеленчук. Потребно е зеленчукот што ќе го употребите да има кратко време на готвење.

И тоа е тоа, целиот рецепт и начинот на подготовка ги имате подолу во рецептот, а имате и видео кај мене во reels на инстаграм.

Доколку сакаш киноа, мојата печена киноа е уште една опција како да ја зготвиш. Многу е едноставна и нутритивно богата. Те охрабрвам да ја направиш уште денес, бидејќи освен што е многу вкусна, се прави многу лесно и брзо а е неверојатно здрава! Доколку ја направиш, тагни го мојот инстаграм профил @marijamarijamarija или остави мо коменар под овој пост.

Печати рецепт

🍲 Печена Киноа 🍲

Автор: Марија Марија Марија

Oпрема

подлабок огноотпорен сад за печење помал, состојките се за 1 порција

Состојки

50 гр. Киноа сува
100 мл. Врела вода
1 помал Домат исецкан на коцки
2 шољи Бејби Спанаќ
1 к.л. Сол
2 к.л. Димена пипер
2 с.л. Маслиново масло
150 гр. Тофу исецкано на коцки
8 Маслинки исецкани
2 с.л. Доматен сос

Инструкции

Земете го тавчето (садот) во којшто ќе ја правите киноата. Ставете 1 супена лажица маслиново масло и убаво размачкајте на дното.
Ставете ја киноата, солта и врелата вода.
Потоа наредете го доматот, па спанаќот, па тофуто, маслинките.
Додадете 1 лажица маслиново, димена пипер и доматниот сос.
Ставете во претходно загреана рерна на 170 да се пече 25 минути.
Оставете малку да се олади пред да послужите.

Вкупно парчиња: 1 порција
(препорачана порција: 1 порција)
Нутритивни вредности од порција:
Калории: 498,8 kcal.
Протеини: 19,6 гр.
Јаглехидрати: 18,6 гр.
Масти: 14,33 гр.
Влакна: 5,5 гр.

* Јас користам мерилки, ви препорачувам да набавите, многу се корисни а воопшто не се скапи. 
** с.л. = супена лажица - ќе го користам како кратенка
*** к.л. = кафена лажичка - ќе го користам како кратенка

‼️Сите фотографии се оригинални, направени од страна на МаријаМаријаМарија, и истите не смеат да се користат без претходно одобрување. Доколку сакате да користите некои од моите фотографии, слободно исконтактирајте ме 💌 .