Ова е една могу вкусна и богата зеленчукова тава (може да се каже и варијација на нашата „турли-тава“, плус минус некој зеленчук). Велам богата затоа што има еден куп зеленчук, а велам варијација на турли тава, затоа што нема бамји ама има наут и пченка. Наутот е уште еден извор на растителен протеин а во комбинацијава оди совршено!
Како да ја подготвите оваа богата зеленчукова тава
Јас прво ги пропржив/издинстав зеленчуците, па потоа ги ставив во тава, ги полив со доматен сос (најдобро е домашен, без шеќер), додадов пченка и маслинки, убаво промешав и ставив да се пече. Целата постапка инаку ја имате во рецептот подолу. Доста важно е дека стои и во фрижидер (погодна е за meal-prep) и вкусна е и по два/три дена!
Медитерански шмек или добро познат Македонски вкус
Несомнено, сè што има модар патлиџан потсетува на македонската традиционална кујна но, пред сè поради маслинките, го има и препознатливиот медитерански шмек. Како сакате класифицирајте ја, оваа богата зеленчукова тава ќе биде вашиот одличен семеен ручек!
Нутритивно богат и здрав оброк
Јас многу сакам „манџи“ и секаков тип на готвени јадења, печени зеленчуци и сите варијации на темата. Така и оваа тава ми беше толку вкусна, но освен што е вкусна е и супер здрава!
🫘 Наут: помага во контрола на шеќерот во крвта, варењето и можe да помогнe во намалување на холестеролот. Наутот ги зајакнува коските и може позитивно да влијае во јакнење на менталното здравје поради холинот – состојка што помага за подобра меморија, расположение, контрола на мускулите и други активности на мозокот и нервниот систем.
🍆 Модар Патлиџан:
содржи антиоксиданси како витамините А и Ц, кои помагаат во заштитата на клетките. Богат е со полифеноли, коишто помогнат во обработката на шеќерот кај лицата со дијабет.
🥕 Морков:
полни се со витамин А и бета-каротен, и можат да го намалат ризикот од дијабетес. Можат да ги зајакнат коските поради тоа што содржат калциум и витамин К. Влакната во морковот помагаат во контрола на нивото на шеќер во крвта.
🌽 Пченка:
богата со витамин Ц, антиоксиданс којшто ги штити клетките од оштетување. Жолтата пченка е добар извор на каротеноидите лутеин и зеаксантин, коишто се добри за здравјето на очите и помагаат да се спречи оштетување на леќите што доведува до катаракта.
🍅 Домат:
одличен извор на ликопен, антиоксиданс кој е поврзан со многу здравствени придобивки, вклучително и намален ризик од срцеви заболувања. Одличен извор и на витамин Ц, калиум, фолат и витамин К.
🫒 Маслинки: имаат многу витамин Е и други моќни антиоксиданси, добри се за срцето и можат да штитат од остеопороза.
🧄 Лук: го зајакнува имунолошкиот систем, помага во намалување на високиот крвен притисок, во намалување на нивото на холестерол и има антибиотски својства.
🧅 Кромид: содржи антиоксиданси и анти-инфламаторни соединенија кои ги намалуваат триглицеридите и го намалуваат нивото на холестерол – што може да го намали ризикот од срцеви заболувања.
Доколку си љубител на манџи и запечени тави, тогаш дефинитивно треба да ја пробаш мојата богата зеленчукова тава. Вкус на традиционалната македонска кујна, со медитерански шмек. Вкусна е, здрава и се прави релативно лесно. Доколку ја направиш, тагни го мојот инстаграм профил @marijamarijamarija или остави мо коменар под овој пост.
🍛 Богата зеленчукова тава 🍛
Oпрема
- тавче за пржење
- тава за печење
Состојки
- 3 помали Модри патлиџани или 2 средни
- 2 средни Моркови
- 1 помал Кромид
- 1 месечинки Лук
- 1 среден Домат
- ½ конзерва Наут
- ¼ конзерва Пченка
- 10 помали Маслинки исецкани
- 2 с.л. Маслиново масло
- 500 мл Томато сос
- 1 к.л. Сол
- 1 к.л. Димена пипер
- ½ к.л. Оригано
- ½ к.л. Магдонос сув, или зачини по желба и вкус
- 1 к.л. Зеленчуков зачин или зачини по желба и вкус
Инструкции
- Исецкајте го кромидот, морковот, лукот и ставете го во тавче на оган да се динста со 2 лажици маслиново.
- Откако ќе омекнат, додадете го модриот патлиџан, доматот и динстајте уште малце.
- Додајте го наутот и зачините и динстајте уште малку додека да се инкорпорираат вкусовите и се убаво да омекне.
- Истурете го зеленчукот во тава за печење, полијте го со доматен сос, додајте ја пченката и маслинките и ставете да се пече во претходно загреана рерна на 170.
- Печете 25 минути (во зависност од рерната). Оставете да се олади пред да послужите.
Вкупно парчиња: 3 порции
(препорачана порција: 1 порција)
Нутритивни вредности од порција:
Калории: kcal.
Протеини: гр.
Јаглехидрати: гр.
Масти: гр.
Влакна: гр.
* Јас користам мерилки, ви препорачувам да набавите, многу се корисни а воопшто не се скапи. ** с.л. = супена лажица - ќе го користам како кратенка *** к.л. = кафена лажичка - ќе го користам како кратенка
‼️Сите фотографии се оригинални, направени од страна на МаријаМаријаМарија, и истите не смеат да се користат без претходно одобрување. Доколку сакате да користите некои од моите фотографии, слободно исконтактирајте ме 💌 .