🌰 Брзи Фереро бомбици 🌰

Овие брзи фереро бомбици се многу поедноставна и побрза варијанта од мојата фереро торта. Не дека тортата не е супер (затоа што е) туку овие бомбици се прават за 5 минути а вкусот е прилично сличен. Богати, чоколадни и крцкави, овие брзи фереро бомбици дефинитивно ќе ви ја дадат потребната енергија, ќе ве заблажат и се многу подобра опција од готовиот купечки десерт. Не дека се ниско калорични, напротив. Неколку пати сум рекла дека и здравата храна е калорична, но едноставно направени се од целосна и непреработена храна, немаат вештачки шеќер и немаат стабилизатори, емулгароти, бои и ароми.

Напротив, имаат само 5 состојки и се прават за 5 минути. Кога ќе ги јадете зависи од тоа колку време сакате да ги зацврстите во фрижидер, а колку време ќе ги јадете зависи од вашата самоконтрола.

Мое е да ве потсетам, бидете умерени! Вкусни се, но една бомбица има 92 калории, па доколку внимавате на дневниот внес, овој факт не смеете да го занемарите.

Брзи фереро бомбици готови за 5 минути

Потребен ви е блендер за да ги сомелете сите состојки – 1 минута. Вешти раце за формирање топчиња – 4 минути. Секако, не мора да брзате и да рушите рекорди во правење, ама супер се за на пример ако дојдат ненајавени гости или ако ви се пријаде благо а немате ништо готово. Јас ги прелив со стопено црно чоколадо и кршени лешници, секако овој чекор е опционален, но го препорачувам.