Овие крофни со тиква се првите крофни што ги правам, а причината е едноставна – немав калапче 🥹 Е сега, откако си набавив, животот е многу полесен… Мала шала, супер кај овие крофни со тиква е што можат да бидат обично колаче (доколку немате калап за крофни) или пак да ги ставите со калап за мафини. Фунцкионираат секако. Плус, се прават во еден сад, многу лесно и едноставно и се супер здрави. Секако, се печат и се готови за 30 минути од почеток до крај (со ладење).
Домот ќе ви мириса на божиќ
Иако „празничната сезона“ се уште не е почната, мене еуфоријата почнува да ме фаќа уште на почетокот на Ноември. Па денес кога ги направив овие крофни од тиква, целиот дом ми замириса толку убаво што се бочувствував како да е божиќно утро а не обична сабота во ран Ноември…
Тиква сега и засекогаш
Веќе знаете дека тиква сакам многу и додека е во сезона максимално ќе ги искористам сите нејзини бенефити и ќе направам многу рецепти. Доколку ви треба инспирација, како и повеќе информации за позитивното влијание што тиквата ги има за нашето здравје, разгледајте некои од моите останати рецепти со тиква:
- Протеински бомбици од тиква и кокос
- Мафини од тиква
- Палачинки од тиква
- Брауни од тиква
- Гранола со тиква
Како да ги направите овие крофни со тиква
Имаат вкупно 9 состојки и се прават во еден сад. Се печат (не се пржат) и од почеток до крај ќе ви требаат 30 минути. Целиот рецепт го имате подолу во постов, а видео со начинот на подготовка имате и кај мене на инстаграм во reels.
Декорирајте ги по желба
Мојата декорација беше едноставна, многу малку сируп од урми и кокос. Одлично одат и со путер од лежник, а можете да ги прелиете со црно чоколадо и мрвки (доколку имате мали јадачи што сакаат шарени крофни). Не пробав, но сигурна сум дека можете да ги наполните со џем или чоколадо, доколку имате шриц за полнење. Во секој случај, како и да ги декорирате и послужите, овие крофни со тиква се полн погодок!
Доколку си љубител на крофни, тогаш дефинитивно треба да ги пробаш моите крофни со тиква. Печени се, здрави и многу вкусни. Плус, готови за 30 минути. Доколку ги направиш, тагни го мојот инстаграм профил @marijamarijamarija или остави ми коментар под овој пост.
🍩 Крофни со тиква 🍩
Oпрема
- длабок сад за мешање
- Калап за печење крофни или мафини
Состојки
- ½ шоља Пире од тиква сварена или испечена и испасирана тиква
- ¼ шоља Сируп од урми или засладувач по желба
- 1 с.л. Ванила екстракт
- ¼ шоља Кокосово масло растопено
- ¾ шоља Овесно брашно
- ¼ к.л. Сода бикарбона
- ½ к.л. Цимет
- ½ к.л. Сол
- ¼ к.л. Ѓумбир во прав
Инструкции
- Ги мешате сите состојки во подлабок сад додека убаво да се соединат.
- Смесата ја ставате во калап за крофни или мафини.
- Печете во претходно загреана рерна, 18 минути на 170 степени.
- Оставате 2-5 минути да се оладат, декорирате по желба и послужувате.
Вкупно парчиња: 4 крофни
(препорачана порција: 1 крофна)
Нутритивни вредности од порција: **(без додатоци, само крофна)
Калории: 136,75 kcal.
Протеини: 3,5 гр.
Јаглехидрати: 27,7 гр.
Масти: 1,9 гр.
Влакна: 3,5 гр.
* Јас користам мерилки, ви препорачувам да набавите, многу се корисни а воопшто не се скапи. ** с.л. = супена лажица - ќе го користам како кратенка *** к.л = кафена лажичка - ќе го користам како кратенка
‼️Сите фотографии се оригинални, направени од страна на МаријаМаријаМарија, и истите не смеат да се користат без претходно одобрување. Доколку сакате да користите некои од моите фотографии, слободно исконтактирајте ме 💌 .