Оваа протеинска пита со многу зеленчук, ја направив сосем случајно, ама излезе толку вкусна што стана дел од нашето редовно мени. Супер е за појадок, ручек па дури и вечера. Богата е со растителни протеини, диететски влакна, витамини и минерали. Со еден збор, има се што ви треба за богат и нутритивен оброк.

Јас ја правев со 11 состојки, плус зачини, ама во основа имате 5, и се останато е зеленчук и можете да употребите буквално што ви душа сака. Инаку, оваа протеинска пита е протеинска, затоа што во основата има леќа и тофу, па оттаму и високата протеинска вреност (има 37гр. протеин од порција) и 600 калории.

Брз, здрав и избалансиран ручек

Комбинацијата на леќа, тофу и зеленчук (и печурки како во мојот случај) создава балансиран оброк кој е богат со протеини и влакна, а истовремено многу лесен за подготовка. Плус, супер е тоа што можете да си ја направите од претходната вечер и да имате готов балансиран оброк за следниот ден. Оваа протеинска пита е хранлив, заситувачки и превкусен оброк! Само е важно една работа да не заборавите – да накиснете леќа!

Како да ја направите оваа протеинска пита со многу зеленчук

Еден супер факт за оваа протеинска пита е што се прави во процесор за храна и потребен ви е само тој сад. Буквално ги ставате состојките во него, блендате и мешате и тоа е тоа. Јас зеленчукот малку го зготвев, што е сосем опционално и зависи од зеленчукот што ќе го употребите. Тиквичката и морковот апсолутно можете да ги ставите и свежи и да ви излезе уште побрза. А можете да додадете и свежи или сушени чери (исто врв).

Леќата е супер-храна што често е потценета. Таа е богата со растителни протеини, железо, магнезиум и растителни влакна, што ја прави одлична за одржување на енергијата и за поддршка на дигестивниот систем. Тофуто е исто така одличен извор на растителни протеини, па комбинацијата на овие две состојки, заедно со свеж и сезонски зеленчук, создава оброк кој е подеднакво вкусен и заситувачки.

Неколку совети плус:
– На дното на тавчето за печење ставам малку маслиново и палента, за да не се залепи и за да биде крцкава (доколку тавите ви се лепат, задолжително ставете хартија за печење).
– Користам многу зачини, за уште побогат вкус.
– Од горе наросувам многу сусам.
– Корнфлексот го кршам со рака и го додавам внатре пред печење, за да крцка повеќе.
– Ја јадам со свежа салата за уште повеќе зеленчук и дополнителна свежина.
– Доколку сте љубител на лут сос, препорачувам!

И не само што е вкусна и лесно се вари, оваа протеинска пита е полна со антиоксиданси, витамини и минерали. Без глутен, без млечни производи и без рафинирани масти!

И на кратко тоа е тоа. Оваа протеинска пита со многу зеленчук е навистина превкусна и супер здрава! Можете да си ја комбинирате со зеленчукот што го имате дома и секој пат ќе биде различна, но подеднакво вкусна. Целиот рецепт и начинот на подготовка е објаснет подолу а имате и кратко видео кај мене на инстаграм во reels.

Доколку ти се јаде пита, дефинитивно направи ја оваа пита со спанаќ и тофу. Многу потсеќа на грчката спанакопита, па можеби и да е повкусна. Не е мрсна (внимаваме на маслото, нели) а богата е со протеини, витамини, минерали и антиоксиданси. Секако, доколку ја направиш, тагни го мојот инстаграм профил @marijamarijamarija  или остави ми коментар под овој пост.

Печати рецепт